ചക്കയട

അയ്യത്ത്
ചക്കപ്പഴം വെട്ടിയിറക്കുമ്പോള്‍
മണം പിടിച്ചെത്തുമായിരുന്നു
മെലിഞ്ഞൊരു പെണ്ണ്
ചക്കക്കൊതിച്ചിയെന്ന് കളിയാക്കിയാലും
ദീനതയോടെ ചിരിക്കുന്നവള്‍.

അയല്പക്കത്തെ പ്ലാവിലെ
കൂഴച്ചക്ക തിന്നുന്ന വെക്കത്തില്‍
വൈദ്യുതക്കമ്പിയില്‍ തട്ടി വീണ
നരിച്ചീറിനെ കറിയാക്കിയ ദിവസവും
ക്ഷണിക്കാതവള്‍ കയറി വന്നു.
കളിയാക്കിയപ്പോള്‍
മെഴുക്കു പുരണ്ട കവിളില്‍ നാണം.

പിന്നെ കണ്ടപ്പോള്‍
ആകെ മുഷിഞ്ഞ്
കണ്ണുകള്‍ കലങ്ങി...
ഒന്നു ചിരിച്ചോ?
വിശന്നിട്ടാണോ വയറിങ്ങനെയൊട്ടിയതെന്ന്
ചോദിക്കണമെന്നുണ്ടായിരുന്നു.

പ്രവാസത്തിലേതോ നിമിഷത്തില്‍
ചക്കയടയുടെ മണം വരുന്നെന്ന്
പറഞ്ഞു കേട്ട സങ്കടത്തിനമ്മ
ചക്കയടയുണ്ടാക്കി വച്ചിരുന്നു.
ഒരു കടി കടിച്ചപ്പോള്‍
ക്ഷണിക്കാതെ കയറി വന്നു
മുളകിട്ടു വച്ച നരിച്ചീറിന്‍‌റെ രുചി.